Li harcèle ene femme maryé: “Mo envi sorti ar twa, mo tann dir to extra bon lor lili”


Sakina, ene femme maryé ki ena 42 ans ek mama 2 zenfants, habite dans ene faubourg Port-Louis. Li ti p vive so la vie trankil ziska zour kot tou in basculé en 2016.




En février ca l'année la, Sakina in trouve ene fausse compte Facebook lor so nom. Dimoune la ti p servi ca compte la avec Sakina so ban photos pou dénigrer so ban camarades.

Sakina in donne ene déposition Cybercrime Unit. National Computer Board ti faire le nécessaire pou delete fausse compte la.

Sakina ti penser zafer la in fini teigne. Mais li ti ena tort. Dans la nuit 27 mai 2016, vers 22H40, li gagne ene SMS dépi ene niméro ki li pas koner. SMS la dire:

Loading...

Sakina mo envi sorti ar twa, mo tann dir to extra bon lor lili. Mo paye twa Rs 10 000, attend mwa kot pharmacie Plaine-Verte, mo pou dan BMW noir lundi 10hrs.

Sakina in choqué. Lin al porte plainte station la police Plaine-Verte. Li dire:

Kan mon call lor ca niméro la, personne pan répon. Après zot in teigne téléphone la même. Mo ti gagne plusieurs messages grossiers ek insultants. Ensuite, ban madames dans mo famille in commence gagne ban messages dépi ca même niméro la. Dimoune la ti p faire li passe pou mo mari. Faire zot kwar ki mo mari p envi sorti ek dormi ar zot.

Sakina in gagne boukou problem ar so famille akoz ca, mais finalement lin réssi faire banla comprend ki pas zot ki ti p faire tousa.

Sakina in al guette opérateur kot SIM card la enregistré pou gagne plus information. Li gagne ene surprise kan banla dire li ki SIM card la enregistré lor so mari so nom. Sakina dire:

Pou enregistrer ene SIM card, bizin présente ID. Mo pas comprend kouma zot in faire pou enregistrer ca SIM la lor nom mo missié avec ene fausse niméro ID.

Sakina in ré porte plainte la police. Mais dimoune la pou contine harcèle li ziska décembre 2016. Li raconter:

Kan mon al kot opérateur téléphonie la lé 3 mars 2017, zot in nek dire moi ki SIM la finn désactivé dépi décembre 2016. La police zot, zot in nek dire moi ki l'enquête p suive so cours.

Inspecteur Shiva Coothen demande Sakina prend contact avec assistant commissaire la police station Abercrombie pou relance l'enquête la.

Source: Defimedia