Fidji, ene travesti, p rod travail désespérément

You can also highlight the text to listen to it.

Choix ki lin faire pou travestir p jouer contre li. Fidji, Andrew Gopal pou l'Etat civil, p galérer pou trouve ene travail.




Li ena 22 ans ek habite Vacoas. Fidji montrer so féminité ouvertement. Mais ca pas al sans conséquences... li pas p trouve travail ek népli koner ki la porte pou tapper. Li dire:

Faire boukou banané ki ca p dérouler. Mo l'apparence physique jouer contre moi. Dans tout interview même zistoire. Kouma zot koner mo ene travesti, zot disqualifier moi. Lerla zot dire ou 'Désolé, on ne recrute pas' ou soi carrément 'On ne peut vous embaucher, car ça donnera une mauvaise impression à nos clients'.

Loading...

Li même pli grand dans so famille. Li dire ki so penchant pou ban zafer féminin rémonte ziska so l'enfance:

Ca in jouer contre moi. Dans l'école banla ti p prend nissa avec moi. Zot ti même agresse moi kan mo ti dans Form 1. Mon bizin quitte l'école.

C'est kan lin gagne 16 ans ki lin décide pou dire so parents la vérité lor li. Li dire:

Au commencement mo parents pas ti p oulé accepter, même si zot ti ena ban doutes dépi avant lor moi parski zamais mo pas ti ena ti copine. Par contre kan mo ti p trouve ene zoli garçon mo ti p dire 'Check ca lom la'. Zot ti p trouve ca bizarre.

Fidji so ban parents in bizin accepter so choix kan lin gagne 18 ans. Fidji in change so ban linges zom pou ban linges madame. Sans oublier ban accessoires ek maquillage. Ene fois ki li transformé, pas facile pou dire si ena ene zom derrière ca image femme ki li projeter la.

Commentaires blessants

Fidji dire ki lin envi lance li dans coiffure kan lin gagne 18 ans. Lin même prend ban cours pou ca. Li dire:

Après 6 mois mon gagne mo certificat. Mais ziska zordi mo pankor trouve ene salon ki oulé prend moi pou mo faire ban séances pratiques. Zot dire mwa 'Nous ban clients pas pou kontan. Li pas pou bon pou réputation nous salon'. Ban commentaires la bien blessant parfois.

So ambition c'est ouvert so propre salon. Mais li bien péssimiste. Li raconte nous 2 expériences kin marque li:

Mo ti envoye mo CV dans ene call-centre. Kan mon présente moi, ene missié dire moi 'Ki ou même ca Andrew la? Nous ti croire ene garçon.' Kan mon dire zot mo ene travesti, zot in disqualifier moi désuite. Zot dire 'Péna problem, pas p prend dimoune'. Ene lot fois mo ti réssi gagne ene travail dans ene call-centre. Mais mon bizin quitté après 2 jours parski zot ti p bien prend plaisir ar moi ek faire ban commentaires blessants.

Fidji lance ene appel ministre Travail ek ban membres public:

Mo zis envi ene chance. Tout dimoune juge moi ek dénigrer moi parski mon choisir ca la vie la. Mais mo pan choisir ca. Ek mo ene humain avant tout. Nous dans ene pays de droit et d'égalité. Pas kapav zis ban travesti ki exclu.